究竟每月喺份糧扣咗5%供款嘅強積金夠唔夠退休用？英國物業投資專家InsideTrack，上個月訪問咗201位專業人士，發現67%受訪者認為唔夠；58%受訪者話要做其他投資，其中分別有45%及42%表示投資股票同物業，當中超過6成投資香港物業。
調查結果幾正常，只係奇怪InsideTrack香港行政總裁韋林話，香港樓市嘅資產升值同強積金回報唔太高，最好投資外國物業。英國、西班牙、葡國同摩洛哥嘅物業，資產升值平均每年有7%，又有出租市場云云。佢哋專做外國物業投資，樓盤分布喺以上幾個地方，華華八卦問吓係咪收兩家佣金，佢就拍心口話冇收發展商佣，只係收客人6萬8蚊入會費同埋萬2蚊年費，再加3%佣金。唔怪之得調查對象都係專業人士啦。