如果計戲碼，今日投資特攻隊揀嚟作推介嘅歐冠盃E組布加勒斯特星隊主場對基輔戴拿模，可能係全日最弱嘅秩序；都係嗰句，好睇未必好賭，星隊主W在望，唔好錯過。冷選可博客軍哥本哈根，於賓菲加主場不敗。華度
星隊今季能夠喺歐冠盃亮相並唔係僥倖，睇佢哋近季喺歐洲盃賽表現，實在有迹可尋，上季就幾乎殺入歐協盃決賽，只係喺準決賽次回合作客米杜士堡時，被對手下半場上演神奇反勝，連入3球遭踢出局。
力爭第3轉戰歐協盃
今季星隊喺歐冠盃，主場只係輸過畀皇家馬德里及里昂兩支勁旅，外圍賽就先後贏過哥利卡及標準列治。該隊現時於分組賽已失晉級資格，但仲有個第3名，轉戰歐協盃嘅席位要爭。
由於星隊目前領先緊基輔3分，首循環星隊作客贏基輔4:1，換言之今日只要打和，都可以保住個第3名位置；相對地基輔唔想提早喺歐洲賽畢業就非勝不可。
正係呢個原因，相信基輔今日老虎蟹都要打主攻波爭勝，星隊就有大好機會搵位反擊。打反擊亦係星隊喺歐洲賽嘅本錢之一，前鋒巴廸亞及攻擊中場廸卡兩人，就最擅長喺反擊戰術上為球隊取得「士哥」。
甚至乎出現另一情況，星隊若開紀錄或早已取得領先，基輔分分鐘失去鬥志，然後成隊散晒，想追近比數都可能會變得無心無力。咁嘅場合，星隊單W梗係抵玩。
賓菲加除「根」有難度
冷選方面，F組賓菲加主場對哥本哈根之戰，兩隊仍有希望爭出線；賓菲加有個咁好機會，主場對住被視為同組實力最弱嘅哥本哈根，梗係望全取3分；但哥本哈根呢班波踢法直接，鬥志鮮明，高空攻勢配合瑞典國腳鋒將柯碧克尤其煞食，一鼓作氣橫衝直撞之下，真係有機會衝散踢法相對較滋油淡定嘅賓菲加防線。
哥本哈根上輪贏咗半力出擊嘅曼聯，士氣大振，呢場「讓球主客和」嘅「客勝」真係值得一諗。
投資特攻隊金句
星隊若開紀錄或早已取得領先，基輔分分鐘失去鬥志，然後成隊散晒，想追近比數都可能會變得無心無力。