港股昨日在18960-19060的100點內反覆上落，恒指最後收19008，升53點。不過期指可能在周一累積唔少淡倉，昨日出現亁挾情況，即月期指升134點，收18999。
前日提過，如果睇唔通後市，可以中移動（941）做盲公竹，中移動昨跌0.15元，收66.65元，正向下考驗20日線（現處65.46元），亦是三角形底部支持，如果確認跌穿，將下試60元。中移動本周是守穩三角形底部反彈；還是跌穿底部向下考驗60元支持，將成為恒指升跌關鍵。
至於滙控（005），昨有大摩出報告唱好，睇160元，刺激股價反彈回146.60元收市，升0.70元。不過在日線圖上，滙控10月至今似是頭肩頂，現正營造右肩，頸線在145.90元水平，若頭肩頂走勢成立，量度跌幅可見140元。但若配合其他形態分析，滙控若跌穿142元，估計140元不是終點，會見135-136元。
綜合兩隻巨無霸的走勢，恒指似乎向下調整的機會較大，但讀者勿心急造淡，因好友有在期指結算前將大市穩在19000附近食糊的手影，昨日的亁挾已可見一斑。
外資行大豐收
由另一個角度看，大市在11月已見頂的機會亦相當大。聽聞不少大行今年已經「耕種」完畢，而且是空前大豐收，如果冇聽錯，佢哋嘅分紅唔係以月份計，而係以年計，仲係兩位數字以上嗰種，所以今年最後1個月佢哋已經係等分紅放假，毋須再搏命。
趙飛雲