外圍股市靠穩，港股昨日即刻反彈，雖然只係升咗53點，但係就掃除咗前日跌200幾點嘅陰影，不過，成交就曳啲，得411.9億元，唔可以話好有動力。
上個禮拜日日成交500億元樓上，前日差少少先夠500億元，昨日成交少得可憐，當中睇唔出有乜理由，要講嘅就可能係俾美國感恩節嘅假期氣氛影響。
不過，人在股海，市旺市靜都要摷吓有冇股票炒，大隻股方面，滙控（005）同長實（001）個勢都幾好，啲C輪都可以諗吓。中移動（941）喺10日線撐咗兩日，如果今日升上嚟收市，收市前都可以買番少少C輪過夜。
油價繼續跌，個下跌嘅趨勢睇唔到有扭轉嘅條件，不過，近日跌得都幾急，睇班大戶可能會喺油價跌多一兩元後掉頭挾淡倉，然後先至畀啲油再跌過，1月期油𠵱家喺58美元水平，如果跌穿56.50美元，就可以留意番啲油股嘅C輪炒番一轉短嘅。
交行C輪9099：國內銀行股個別發展，回緊嘅股份相信只係唞唞氣，唔會回好多。早兩日交行（3328）冇跟大隊升，下試10日線，企得好穩，昨日止跌回升，高收7.07元，升0.42%，睇幅圖，應該可以升返上去試早日個高位7.56元，破位就睇7.80元。
股票係輪流炒嘅，呢樣嘢唔係秘密，今日可以睇實啲交行C輪。
C輪9099昨收1.08元，槓桿率6.6倍（有效5.1倍），對沖值0.78，引伸波幅升緊，昨日係31%，正股炒上，隻輪會升得好貼價，正股升到7.56元，9099應該唔會低過1.45元，正股上試7.80元，9099應該喺1.65元樓上，呢個價買入，正股跌穿6.85元止蝕。
俊樺