小弟自細已是賭精，記得初中時已託表哥投注賽馬；或者當時普羅馬迷英文水平一般，馬會都為外籍騎師及練馬師起個親民的中文譯名。好似簡廐主帥雷誠，「誠誠實實」，配合佢場場拼盡嘅騎功，真係相得益彰。直至現在，蘇銘倫、杜利萊，都係又好記又有意思，雖然個譯名同英文發音有好大出入，但馬迷似乎毫不介意。
同一屋簷下，足智彩對中文譯名不單止唔親民，甚至達擾民程度。相信全港有90%球迷，都知道曼聯有個球星叫C朗拿度，本報早前譯作基斯坦奴，之後都順應民意，改用埋C朗拿度，不過足智彩又譯咩呢？基斯坦奴朗拿度是也。
其他擾民譯名例子仲有里昂中場祖連奴比南布肯奴、利雲特後衞阿歷西斯蘇亞雷斯，最新例子係阿士東維拉新晉中場伊塞亞奧斯邦尼，我忍唔住問吓馬會，係唔係歐洲球壇有好多個奧斯邦尼，要幫佢加個伊塞亞作區分？
Dawson譯音鬧雙胞
足智彩又係唔係有一個特定嘅譯名系統呢？又好似唔係。侯城中堅唐臣同熱刺中堅戴臣係兩兄弟，個姓一樣係「Dawson」，足智彩都可以搞兩個譯名出嚟，真令人啼笑皆非。球員名𠵱家唔止係資訊一種，當你電話投注首名入球，臨場講完一堆水蛇春咁長嘅名，場波都可能截止投注，你話對投注額有冇影響吖嗱？文：牽牛