畀得出大嗱嗱幾千萬買樓，梗係想背山面海，坐擁無敵靚景啦。好似新地旗下嘅豪宅「荔枝角曼克頓山」，大力推銷個盤嘅景觀掂，可以望到昂船洲咁遠，呎價仲萬萬聲㖭。向南單位係就係望海，但係原來離佢唔遠、入咗伙年幾嘅公屋海麗邨，亦都係望住呢個無敵海景，但人哋只需每月千零蚊租咋。
網友E尋D找W櫻I花N草發現到呢樣嘢，前日喺香港討論區起咗條題：「我想問吓公屋海麗邨嘅景觀，同千萬豪宅曼克頓山，真係有咩分別呢…近海嗰啲位置，論景觀海麗邨仲好似好過曼克頓山。」
有關議題即刻引嚟成40個回應。thomastiger答佢：「觀景大多沒有分別，分別是公屋同豪宅。」；rukawa635亦加把口：「我有個friend都係住海麗，佢間房隻窗一望出去已經係昂船洲了…」
公屋豪宅同一景觀
有網友就話𠵱家公屋同豪宅好多時只係一街之隔，好似華富邨個海景同貝沙灣其實都係一樣。momoamandy就覺得好唔抵，因為以前公屋同豪宅就真係差一大截㗎嘛，啲豪宅邊會「紓尊降貴」，起埋喺差唔多地段？佢話：「我細個時都係住公屋，日日行8層樓，與老鼠野貓為鄰，唔多明白是否社會進步太快，竟然公屋同豪宅曼克頓山可以同一景觀。」
唔知班海麗邨居民𠵱家係咪喺度陰陰嘴笑緊呢？望咗年幾海，都唔知原來住緊嗰度咁值錢，真係唔知係買曼克頓山啲人笨定佢哋執到呢？