某日賴悠閒，搭叮叮去TimesSquare；見到波斯富街有間上樓Cafe──ColoUrs，門面裝飾得好似七彩蝦條姐姐咁搶眼，忍唔住就衝咗上去歎杯茶！
一入門口不得了！全店貼滿客人嘅開心合照，雖然時值4點落場時間，Cafe冇乜人，但嗰種開心氣氛仲可以喺空間中迴盪！Cafe陳設相當迷幻，60、70年代的方形、圓形圖案家具放滿一室。好蠱惑地選了近窗的一張枱，問店員有乜好介紹，整來是一杯奇妙戀人，士多啤梨、蘋果、橙、奇異果等生果放得成個杯面都係，配紅茶果汁底，唔太甜，真係香到無倫！
邊飲茶回望街上的電車站，嚇然發覺車上竟有3個人看着我在窗邊飲茶，眼中仲有一種羨慕的神色；除咗講飲講食，有時玩吓食地方都相當開心㗎！
記者：朱崇德
ColoUrs（25041234）
地址：銅鑼灣波斯富街68號1樓前座