巴西球星卡卡話自己計劃讀神學，仲考慮將來瞓身傳教，同時間，佢亦自爆喺世界盃8強輸畀法國嘅賽前明明有傷扮無事，連當時教練彭利拿都呃埋。今次佢「公開告解」，唔通真係想快啲洗清罪惡，為將來宣教鋪路？
卡卡唔單止係虔誠天主教徒，不嬲嫖、賭、飲無瓣啱，正氣到無倫，由佢傳教肯定係教會之福。有邊個估到呢個咁正氣嘅球星都做過大話精？佢早兩日向巴西傳媒爆料，原來佢喺世界盃16強對加納嗰陣已經整親膝頭，根本趕唔切8強對法國時好番，但為咗唔想錯過呢場大波，幾大都呃當時教練彭利拿，話自己OK可以落場，而佢死頂嘅結果係喺比賽中毫無表現，巴西最後輸0:1出局。
佢補充話巴西出局並唔係一個人責任，而係大圍問題，例如決賽周前備戰計劃差，同埋次次練波都有成棚「粉絲」圍實，無私隱兼困擾等等。
任佢點補飛都好，如果佢當時無做大話精，彭利拿一定搵個無傷無病嘅球員落場替佢，點計卡卡都算係間接令巴西出局嘅罪人喎！枉彭利拿當日咁信任佢，結果隊波出局自己又執包袱，唔知老人家聽到愛將呢次「告解」，會唔會激到嘔血？
「我求大俠唔係教徒，但讀書時代都念過吓天主經，知道寬恕別人嘅重要性，卡卡今次自爆講大話都算勇氣可嘉。如果你係巴西躉，你肯唔肯原諒佢？」