歌星李玟嘅男友BrucePhilipRockowitz（圖右）身兼利豐嘅執行董事，噚日聯交所嘅資料顯示，Bruce響上個禮拜三及四，合共沽咗1100萬股利豐，套現2.4億元。上個禮拜五，利豐創出23.9元嘅收市新高，Bruce喺新高前沽貨都算叻仔，噚日利豐跟住大市跌，足足跌咗3.56%，收23.05元，唔知Bruce有冇再沽貨呢？
講開阿Bruce，點解佢會做咗利豐董事，同埋係馮國經兩兄弟以外，持股最多嘅董事呢？事緣六年前，利豐睇中咗阿Bruce嗰間ColbyInternational，所以收購咗Colby，畀咗一批股份阿Bruce，又邀請佢入董事局。雖然Bruce套現咗2億，但佢仍然揸住6927萬股利豐，市值差唔多16億元。
至於阿Bruce點解要賣股呢？華華估，早前李玟話男朋友曾經向佢求婚，唔通阿Bruce套現搞結婚，如果佢掟晒兩億嚟搞，分分鐘豪過TomCruise喺意大利古堡搞嘅世紀婚禮。