名叫YAMAHADRAGSTAR400的日本巡航機車，向來給人的感覺是相當有哈利Feel，論型態和賣相也反映出有濃厚的大美國精神；而在市場上專為它而設的改裝配件也非常多，其中最受歡迎必定是電鍍配件，無論小至指揮燈、大至油缸也好，只要閃閃生輝的，鐵騎士都會將之裝在車上。但車主阿肥卻持相反意見：「有時將部車交俾其他人改裝，不但花嘅錢隨時多得很，而且更會令車子喪失原來嘅神韻，那倒不如自己動手，將之變成流浪漢Feel，可以更顯現出自己的Style！」
記者：TigerL
攝影：陳陶鈞
把DIY精神傳給友人
車主阿肥，絕對是個能夠將愛驅DIY改裝到一個非常個人化，而又切合實際需要的少數民族：「可能我由細到大都鍾意做吓手作仔，只要能力內可以做到嘅都會DIY一番；自從買咗YAMAHADRAGSTAR400，自己落手落腳改裝嘅興趣就更大，因為已經唔只滿足到自己嘅需要，更重要係呢種DIY精神，可以帶畀身邊所有喜歡改車嘅朋友，因為有時自己改仲好過俾人改！」
由驚坐電單車到愛不釋手
查實，阿肥喺沉醉於DIY改車前，曾經連揸電單車也想過放棄：「記得幾年前，啱啱考到電單車牌嗰陣，當然想即刻買車揸，但一坐落去，第一個感覺只係得個驚字，行駛過程中無一刻有安全感，心諗：死啦！點算呢！雖然好鍾意揸電單車，但係一日克服唔到操控呢個問題，就根本無辦法同架車溝通到，爭少少仲想放棄。好彩之後聽咗幾個揸開電單車朋友嘅意見，慢慢咁一步一步從改變心態開始，先至可以好似家陣咁，唔揸唔得。」
DIY改裝玩性格
「有次喺街，有位揸電單車嘅朋友走過嚟問我，話個個都鍾意將大量電鍍Parts放喺愛驅上，但點解我偏偏背道而馳，改到成部車黑黑沉沉、殘殘舊舊咁樣，唔知仲以為喺廢車場執番嚟；我笑住答佢話特登將部車改成咁，係因為美國人喺好早期已經玩呢種流浪風格，佢哋通常會一班人一齊穿州過省，喺長途跋涉嘅情況下，部車通常都會滿布沙塵（佢哋大多數揸哈利），如果喺香港搞到架車咁，大部份車主都會呱呱叫，但係反觀美國人就相當Enjoy呢種造型同風格。
其實我都係跟風㗎咋，唔見得好特別，不過喺香港玩呢種風格嘅電單車，又的確係少之又少。為求原汁原味，除咗無辦法改裝嘅配件，好似頭Fork咁要買之外，其他可以整到嘅都會自己整，例如高把手、油缸皮做帶、Seat位、Seat位靠背同埋死氣喉等等，都係自己一手一腳整，DIY仲有個好處係比較實惠，好似我架DRAGSTAR400咁，揸咗4年改咗3次，加埋都只係1萬蚊左右，而且因為我開皮具店，所以有啲皮革配件可以話係唔使錢，我仲設計緊一個皮做嘅邊袋，遲吓就會面世啦。」阿肥笑着說。
YAMAHADRAGSTAR400規格
引擎：399c.c.空冷4衝程V2SOHC
馬力：32ps/7,500rpm
扭力：3.3kgm/6,000rpm
傳動：5前速濕片式多片離合器
懸掛：
（前）套筒油壓前叉
（後）單筒油壓彈簧
制動：
（前）282mm煞車碟配浮動兩活塞卡鉗
（後）機械鼓
油缸容量：15公升
售價：$65,000
查詢：萬里達車行（25763079）
