阿仙奴同利物浦上周六聯賽真係害人不淺，雙雙僅和對手；不過周中回師歐冠盃應有另一番表現，值得追多一次。
阿仙奴上仗主場僅迫和紐卡素，好大程度因為上半場收起射手亨利，下半場一放亨利入嚟，即時成隊生猛晒，亨利亦射個靚罰球扳平。
今次主場面對篤定出局兼連歐協盃都冇得打嘅漢堡，贏波應該無問題；不過阿仙奴主勝咁乏味，不如換個角度，博亨利首名入球，事關雲格上場刻意讓亨利休息，擺明希望佢今仗數糊，首名入球熱得有道理。
利物浦周三主場出擊，同燕豪芬爭首名，呢排利物浦領隊賓尼廸斯俾人鬧到飛起，成日轉陣搞到入唔到波，不過其實只係作客問題，利物浦主場出擊，仍然信心十足；之前歐冠盃分組賽主場兩戰都贏，無獨有偶都各入3球，今仗再向利物浦入3球埋手，但燕豪芬始終有攻力，一於博利物浦險勝3:2。
切爾達作客清「卡」數
周四歐協盃賽事，紐卡素分組兩戰全勝，6分在手，出線應該穩陣，睇嚟都要將心機轉到聯賽上，今仗主場對切爾達勝算平平；切爾達挾上仗作客擊敗拉科，今次有力再下一城，一於博客軍贏2:1。
文：牽牛