足球比賽猶如戰場，唔係你死就係我亡。車路士，手握巴塞生殺之權，如果你係摩連奴，你會點樣玩？
呢個禮拜焦點賽事當然係不來梅對車路士，重點係車仔會唔會放水！我好矛盾，一方面想巴塞出局，話晒佢都係車仔嘅主要敵人。到咗淘汰賽階段，可能隨時要對番巴塞！
但係，咁樣贏得無說服力。就好似當年法國喺98年攞世界盃冠軍，贏巴西無說服力一樣！後來，德國世界盃，巴西再次被擊倒，證明法國係可以食得住巴西，因為咁，我從此收聲！同樣道理，我希望歐冠盃決賽係巴塞對車仔，邊個輸，都心服口服！招積嘅摩連奴應該係要咁諗，所以車仔唔會放水，加上不來梅憑實力隨時都可以贏波！
陸軍阿仙奴齊W
歐冠除咗車仔外，我最留意就係中央陸軍。我好鍾意啲俄羅斯/前蘇聯波，夠機動、兩翼快，一個突擊就攞你命。今晚仲要主場，我撐陸軍贏波圖。至於兵工廠，上屆失意歐冠，當然想報仇，儘管近況麻麻，但有留力之嫌，對住榜尾已出局嘅漢堡，攞3分無問題，我瞓晒成副身家支持兵工廠！
周鵬
商業1台《球迷集中贏》主持
電郵：[email protected]