一年一度由董事學會主辦嘅傑出董事獎，噚日舉行記者會公布得獎名單，俾海域事件搞到一身蟻嘅董事學會前主席許浩明冇到，而15間得獎嘅公司代表，影完大合照之後就走夾唔唞，只剩番中遠控股同中遠太平洋兩母子肯留多一陣，身兼兩家公司嘅董事長魏家福仲笑到四萬咁口，佢話兩母子一齊攞到「傑出董事會」嘅獎座，證明全個團隊24個董事嘅管治水平都非常好。
仲有，佢話中遠控股係首家H股公司喺香港獲得呢個獎，證明國企管治水平，有能力達到香港資本市場嘅要求。佢又好多謝港人治港、一國兩制、證監會、董事學會、本地股民同投資者嘅長期支持，總之，幾乎所有四字詞語都俾佢讚晒，誇張到不得了。
記者會之後至舉行頒獎禮，馬時亨係嘉賓之一，唔知係咪諗起早前海域孖寶爆煲時，啲非執董紛紛跳船，噚晚佢致辭時，就不點名話嗰啲以「私人理由」辭職嘅董事，話佢哋冇盡到監察職責，到出事時，想有行動又已經太遲。佢話，咪以為用「私人理由」辭職，諗住可以逃避法律責任，實情係錯誤嘅，法庭會根據公司法，判斷有關董事應負責任。
肥馬話，所以各董事一定要時刻對公司業務保持警覺，又要不斷增值，upgrade自己。局長今次真係用心良苦。
[email protected]