超人個李嘉誠基金會噚日因為周凱旋而再次成為話題，名人嘅基金會似乎成為潮流，新鴻基地產嘅郭氏基金亦好落力，喺03至07年呢4年內，會捐出1630萬人仔，畀北京中華文化學院。
郭氏基金喺院內設有「新地郭氏基金外語培訓中心」，首要目標，係提升公務員英語水平，喺每年嘅捐款中，有250萬人仔用嚟搞「公務員實用英語培訓班」，初期集中培訓中西部公務員嘅英語，唔經唔覺已經搞咗7期，受惠學員近400人。
咁中國人最講禮尚往來，學院趁今年建院50周年，搞番個「捐贈暨答謝會」，請埋郭炳湘伉儷嚟當面道謝一番，有份出席嘅中央統戰部部長劉延東，仲陪郭氏伉儷共晉晚餐，兼觀賞文藝晚會。