上個禮拜五美股個勢都幾好，諗住昨日港股可以試日前嘅高位，點知㗎仔個市唔生性，跌到一仆一碌，港股班淡友自然把握機會搶攻，兩隻重磅股滙控（005）同中移動（941）就做咗箭靶，係咁俾人質，結果分別跌咗0.88%同2.69%，恒指唔見咗228點。
個市升咗咁耐都冇大調整，昨日跌嘅幅度係近期「罕見」嘅，等緊買貨嘅股民自然又會習慣性咁縮沙，啲淡友其實仍處於下風，攻咗一段自然又會保守啲，所以大市嘅成交縮咗，唔夠500億元。個市係咪已經見咗頂？呢個時候討論呢個問題似乎早咗啲。上個月期指結算恒指企喺18298收市，𠵱家班好友仍然有好明顯嘅優勢，點會咁輕易俾淡友攻番轉頭，只要外圍造番好少少，相信好友又會挾番轉頭，暫時睇嚟，恒指會喺18750同埋19000之間上落。
港股雖然出現調整，但係炒家仍然唔會寂寞，啲國內銀行股炒咗一輪，呢兩日只係略略調整吓，昨日又全線異動，一齊炒上，睇嚟大茶飯仲未食完，跟住呢幾日，應該都係佢哋嘅天下。
中行C輪2466：咁多隻內地銀行股之中，論成交嘅變化同埋技術走勢，最正嘅就係中行（3988），昨日報收3.82元，大成交「破腳穿頭」，今日升破4元關嘅機會好大，下個位睇4.50元。
C輪2466昨收49仙，仲有101日壽命，溢價只係1.5%，實在好抵，槓桿率7.8倍（有效6.9倍），對沖值0.885，引伸波幅21.9%，升緊上嚟，對槓桿效應嘅發揮好有利，正股升上4元，2466應該會逼近65仙，正股升到4.50元，2466應該喺1.10元樓上，呢個價買，正股跌穿3.68元止蝕。
俊樺