呢幾日收到三封來自「長期讀者」嘅傳真或電郵。傳真嚟嘅讀者認為《蘋果》讀者既多且廣，有三分一係冇咗名采副刊就會轉睇其他報紙嘅。呢個數字唔知有冇根據，主觀估計比較難以令人信服。一位女士話睇左丁山好耐，覺得係最佳通識教育教材。呢個說法就令左丁山慚愧咯，唔敢當。左丁山認識嘅朋友中，專家學者甚多，若以通識而論，岑逸飛、陶傑、劉天賜都令左丁山服到五體投地，同佢三位坐埋食飯，左丁山幾乎冇插嘴餘地，因為講電影、音樂、旅遊、文學、藝術、歷史、哲學、政治、謀略，四書五經，中外古典以至玄學、西方神秘宗教，佢三位都可以一個人講晒。只有提起跑馬、體育、財經金融，先至輪到左丁山加把口。岑逸飛更可以講埋數學、科學㖭，因為佢係理科出身，喺新亞書院讀過化學、生物與哲學三個學系。佢返中大逸夫堂向新亞同學演講，由易經二五仔講到新亞精神，有在場者話左丁山冇份聽係大損失。咁啱岑逸飛與劉天賜都係哲學系師兄弟，故此左丁山對主修哲學嘅畢業生，特別注意，例如梁文道。
一位讀者「大飛」問「捉錯用神」還是「捉錯弄神」，哪一個詞先至啱。「大飛話」：「從字面上，我覺得不會是個『用』字，因為沒意思，在雅虎搜尋，有人用『弄』，有人用『用』，究竟誰是誰非？」答案簡單得很，「捉錯弄神」冇意思，「捉錯用神」先至啱。「捉錯」即係搞錯，誤中副車；「用神」係名詞，不可分為「用」與「神」兩個字。首先講「神」，在算命理論方面，有十「神」之說，指正印、偏印、傷官、食神、正官、偏官、正財、偏財、劫財、比肩，以顯示「生我」、「我生」、「尅我」、「我尅」、「同我」等五種相生相尅關係。
「用神」就係指「何神為我所用」，係八字命理嘅中心樞紐：譬如今日係十一月二十日，農曆九月三十，如果在下午三至五時出世，八字就係丙戌年己亥月癸丑日庚申時，命書話此命用神在庚辛，癸（陰水），宜有庚辛（陽金陰金）生之。故此庚為癸之「用神」，捉錯咗用神就會算錯命。