身為放盤業主心態很矛盾，既想有多啲客上門睇樓，但當單位仍然住緊時，又怕客人出出入入，打擾生活。網民Karen789應該是第一次賣樓，感覺更困惑，於是在《親子王國》討論區，提出「係唔係自住賣得麻煩啲？」繼而再問，「如果買家有興趣，究竟先還價後睇樓，抑或睇多次先還價？」
唔到價咪畀客睇樓
第一題就有alberthhy直接回答，「應該有啲。」第二題win妮推測，「我估買家都冇出價，地產試你個價就真！」
另一位網友施晴媽咪，賣樓經驗較豐富，建議最為實際，「你set個價，叫agent唔到價唔好嘥時間，而set個價貼近呢一兩個月成交價，仲要企硬，唔好畀人未睇就講價。」
施晴媽咪的確立場堅定，不受他人影響。她表示，曾有agent冇預約，就按大廈對講機話，現在帶客上門睇樓。「我心諗囡囡剛剛瞓咗，唔想被打擾…同埋覺得agent奉旨咁，我唔like，咪同佢講𠵱家趕住出街。即使佢話『個客響度，睇一睇好快』…我都幾寸吓，話唔畀睇就唔畀睇，仲鬧佢都冇約。」
此外，網友琬晴B最近賣出單位，但尚未交吉，仲住緊。她教路見招拆招，首先千萬不要讓經紀知你急住賣，亦不要太輕易讓佢哋試到你的底線。遇上還價低的情況，都不要緊，「若果你不急賣，就同佢講『太低了，這個價我不會賣。』如果你急賣，就不妨再還價畀個客，提高10萬或以上也可以，因為經紀鍾意食價，有興趣嘅買家未必還一個『低價』，可能是經紀想試探你，希望容易做成單刁。」