上星期油價反覆下跌，受惠股除咗有航空、航運、石化股之外，受油價高企壓抑咗好耐嘅工業股，都係時候要重新抬頭。工業股過去幾年唔少Topline續有增長，可惜Bottomline因為成本無辦法對沖而受到壓抑，故此，一旦油價急跌，工業股盈利會急速膨脹。
受油價影響最大嘅原材料有塑膠，要用塑膠多數係輕工業，包括玩具，上星期就有隻玩具股和記港陸（715）連升兩日。呢隻股票，股價跌咗差不多1年，持有嘅股民，日日睇住個市創新高，呢隻股卻幾乎日日創幾年低位，其實都相當慘情。
間公司係和黃（013）旗下附屬，較大動作係去年11月向和黃購入上海世紀商貿廣場，以提供穩定租金收入，同埋今年1月委任陳雲美為公司新董事總經理。呢位新MD，同地產界頗有淵源，曾任職美聯（1200）海外樓盤推廣部門，之後就喺鵬利、鷹洋、太平洋等多個機構出任要職，最後被和黃睇中，獲邀做中國物業巿場部經理。
睇番去年注資交易，發現公司解釋買入國內物業，理由係人民幣升值對製造業務帶來壓力，收購物業有助達至對沖效果。和記港陸前周一由近4年低位0.51元，急升至0.58元收市，成交有36球幾，旗形整固後再上，上周五收0.60元，且看有無新消息跟進。
歐陽風