近日，恒指企穩19000點樓上，又連升4日，每日成交額更激增至逾500億元，不少股民趁機入市，希望賺番筆。眼見大市興旺，《香港討論區》內有網友問，有冇人借錢炒股？多方網友紛紛回應，更指已經用信用卡貸款嚟炒股，博股票升值能還息兼賺番些少。
網友carmansze999話：「我有6萬數信用卡未找，用晒嚟炒股票。」網友ftotx話：「我用緊銀行推廣嘅循環貸款嚟炒股，借咗一萬銀，3個月期限，每個月都只係畀80蚊利息。」
年利率30厘 不如用私貸
不過，不少網友指，用信用卡貸款炒股，實在好高風險，未賺錢之前先要還高息，極之唔化算。網友jackymli話：「信用卡貸款息口非常高，年利率通常都介乎20厘至30厘左右，借呢啲錢嚟炒股，博唔過。」網友duenku亦同意，笑言：「有冇一隻股票一年內包賺30%先？即使有，都要蝕風險補償同機會成本啦！」
因此，大多數人不贊同用信用卡貸款嚟炒股，反而可考慮私人貸款，好似網友ftotx嘅做法，息口應該會低啲，賺錢機會自然就大增。