港股上周再創新高，恒指靠近19200收市，升勢持續，仲未出現顯著調整，會唔會有啲高處不勝寒呢？
指數升咗咁多，好多人都會有一個諗法，就係個市好危，好易大插，上升空間唔大，唔夠值博率。這種諗法聽起嚟好有Point，好易吸引人buy。不過，大家仔細諗吓，可能會有完全唔一樣嘅睇法，點解個市升得多就要大插，就危危乎，上升嘅空間就唔大，值博率就細？究竟有乜嘢支持呢啲講法？俊樺唔係話個市一定會升或一定唔會跌，但係就諗唔到上述嘅講法有乜嘢實際嘅支持，起碼有咁嘅講法嘅人冇講清楚。
要搞清楚𠵱家仲可唔可以入市，有冇高值博率，唔可以想當然，喺唔適當嘅時候入市，同冇喺適當嘅時候入市，一樣咁慘。
中石化C輪9679：中石化（386）受惠油價回落炒上，事實上，剛被選為恒指成份股亦吸引基金買盤，無論從基本同技術角度睇，中石化都好有吸引力，股價上日報收5.82元，睇嚟好快會突破6元關，炒上6.50元，C輪9679上日報收59仙，槓桿率9.9倍（有效6.3倍），對沖值0.63，引伸波幅上緊，正股升上6元同6.50元，9679應該見到70仙同埋1.05元，呢個價買，正股跌穿5.68元止蝕。
國壽C輪2178：國壽（2628）上個禮拜四忽然停牌，搞到個場亂晒龍，禮拜五話有好消息，股價即刻抽上，高收18.44元，試20元唔使好耐，破位先睇22元，C輪2178上日收1.79元，槓桿率10.3倍（有效6.3倍），正股升上20同22元，2178應該唔會低過2.80元同4.30元，正股跌穿17.50元止蝕。
俊 樺