啱啱公布收購聖安娜嘅利亞零售主席馮國經，噚日見到記者即刻企定定做訪問，不過，唔係詳細講番單刁，或者講吓發展大計，反而係以機管局主席身份，講番機場動向。
馮國經一開始就話香港經濟一直建基於「四流」，即係人流、物流、資金流同資訊流。華華就認為乜流都冇所謂，最重要唔係九流就得啦，但係𠵱家香港機場好似愈嚟愈唔見使，仲開始出現空中塞機情況，咁點搞呢？
佢就話，興建第三條跑道到𠵱家，仲未有定案，重點係物盡其用谷行現有兩條跑道，或者考慮同珠三角機場共同合作。另外，佢話機場建金庫可以提升香港金融中心地位，𠵱家準備工夫已經搞掂，仲同本地金商、銀商詳細傾緊點做，入咗大直路去到finalstage㗎喇！
聖安娜就快機場一步俾佢私有化咗喇，咁機場幾時上市呢？馮國經話，𠵱家冇咩透露，淨係話readyfor上市，但話事權就唔喺佢手喎。