電盈啱啱以高達10億天價投得英超聯獨家轉播權，噚日已急不及待喺一年一度嘅運動會上，展開重點宣傳。喺運動會嘅開幕禮上，蘇澤光一聲響號，着上波衫嘅財務總監艾維朗，同一眾高級管理層，每人一腳將足球踢出，作為開幕禮儀式。雖然老細李澤楷冇到，但員工都冇偷懶，喺大會進場門口，泊咗一部now寬頻嘅流動宣傳車，播放now寬頻節目，兼且有推銷員向自己友拉客，娛樂不忙工作，認真賣力。
副主席JackSo蘇澤光話，now係經過小心計數、深思熟慮後，先決定競投英超，絕對唔會亂花錢，相信會對未來業務發展有幫助，但收購成本、估計吸納多少新客？JackSo一律拒絕回答，只係話明年業績公布時就會交代。咁遲至開估，大家要賭吓電盈管理層嘅能力喇！