上星期五（11月17日）PS3行貨到港，可惜首批公開發售主機名額有限，只得200部，搞到班機迷要排通宵爭崩頭，部份買家忍唔住喺首賣日當住全港傳媒起哄，其中一位阿叔更大發爛渣，爆晒粗力數SCE搵佢老襯，夾硬要困住佢排隊嚟做宣傳，此言一出，個個矛頭直指SCE安排不周，但到底實情係咪咁呢？
自稱姓陳嘅阿叔向記者表示，佢買機畀屋企嘅小朋友玩，朝早七點畀咗錢，SCE遲遲唔肯交貨，幾十歲人連廁所都無得去焗住要排隊，之後仲話日本仔呃香港人錢，搵佢老襯。
SCE香港市場部高級經理項明生指出，大會早已表明發貨時間係十一點，而買家付款後，可以選擇即時排隊拿貨，或者稍後時間拿貨，所以唔存在話焗住要排隊嘅問題，嗰位阿叔係排隊黨成員，早前滙豐送PSP活動裏面佢都有份排隊，聽聞話佢今次排隊可以賺到兩千蚊人工，而佢係急於交貨所以先至發難。
傳聞逐一破
項明生表示，傳聞日本本土減發兩萬機嚟分畀香港，是絕對錯誤，因為日本版電壓同香港唔同，點可能將批貨轉嚟香港。佢又話派咗250個籌，最後嗰50個係後補籌，即係話200籌中有人放棄唔買，候補籌就可以順序補上，但事實上當日只有一位買家放棄，由第201號籌補上。
文：周達之