TCL多媒體收購法國湯姆遜彩電業務，碰得焦頭爛額；不過，聯洲國際去年收購德國Salamander，聯洲董事黃偉光就好滿意，因為只以賣家叫價三分之一價錢就買到，仲為股東帶嚟35%嘅派息比率。
佢日前喺股東會後披露呢單刁嘅重要策略，就係要奪得對方員工芳心。因為德國公司董事局裏面，有一半係勞方代表，於是佢哋重點游說員工，話收購後，保證5年內可以留喺新公司工作，就係咁，面對60多個競爭對手，而且出價只係賣方叫價150億嘅三分之一──即係50億──都可以脫穎而出。
仲有，聯想之前貼咗大熱細哨做世界盃嘅宣傳代言人，點知大熱倒灶；聯洲就貼中意大利贏世界盃，結果佢哋隻Puma手錶好賣到不得了，亦證明眼光唔錯。黃偉光話，今年喺大陸嘅銷售點，要由𠵱家只得兩家，一年內計劃急速擴展至300間，若果呢次又中，就真係證明到佢哋夠眼光喇！