股路縱橫:偏低股接力上五礦衝3字頭

股路縱橫:偏低股接力上五礦衝3字頭

中國概念股大牛市,強者先行,落後股只待幕後人作好部署,就會發力。早輪講過嘅中保(966)愈行愈快,由推介時的6.10元,1個月多啲,升破8元大關,升幅31%,銀建(171)亦已啓動,仲係大成交升破250日線。開車股陸續有來,上周五又有1隻,就係專做鋁業嘅五礦資源(1208)。
五礦沉咗好耐,過去5個月,股價都只係在2元至2.30元間上落,上周五終於出現突破,個勢好靚,高收2.36元,唔單止升破三角形嘅下降軌,仲拋離晒10日、20日、50日同250日平均線,更有2400多萬股大成交支持,而10日同20日線亦會好快升破50日同250日線,確認中期調整完成,開展大升浪,初步目標係3月底嘅高位3.10元。
五礦母公司係中國五礦集團,主要經營原鋁貿易,係母公司在港的上市旗艦,去年注資1次,今年上半年盈利即大升,五礦最近先發咗1批10億元嘅零息CB,有錢在手,第2單注資相信好快水到渠成,呢個係第一個利好因素。
五礦06年(12月年結)中期盤數好靚,營業額68.58億元,大升9.3倍,獲利5.8億元,升4.8倍,每股盈利0.34元。五礦做買賣,鋁價回落,平買平賣,影響唔大,就算保守計,下半年只賺4.2億元,全年合計10億元,每股盈利0.58元,以目標價3.10元計,預測PE亦只係5.3倍,係第2個利好因素。

第2次注資快落實

五礦會好快向母公司收購廣西華銀鋁業及SherwinAluminaL.P.,同時亦會橫向擴展鋁以外嘅其他有色金屬業務,日後會成為一家從事有色金屬供應鏈業務嘅綜合企業集團,同湖南有色(2626)PE22倍比較,五礦偏低得好吸引。
母公司去年注資,收取五礦股票,每股作價係2.86元,最近發行嘅CB,換股價係2.925元,同當時股價比有30%溢價,大股東同債券持有人對五礦前景確係信心十足。
郭兆誠