李澤楷賣唔賣得成8號仔，呢個月尾就開估，而買家誠實小番薯個「水喉」亦經已曝光——真係李澤楷個親生老豆李超人，與此同時，小超人畀立法會個封信裏面首次開腔，話問咗番薯梁好多次，但都係話唔知佢阿爸有份科水，而佢對於阿爸嘅參與就好遺憾......而對於首富兩仔爺溝通似乎出現問題，有網友就質疑究竟李嘉誠同李澤楷係唔係一家人嚟㗎?
兩個人無溝通
《香港討論區》23586452話點解兩父子有重要嘢講，要問梁伯韜；小超人有嘢問老豆，點解唔直接同佢講，硬要問咗番薯梁先？佢認為李家屋企似乎唔係幾和諧，最好搵社署輔導下呢兩父子。而rorbo_robo就認為幾好笑，簡直係鬧劇!
至於小超人的「遺憾」言論更引起廣泛討論，william_ng同lmyiu話，李嘉誠有李澤楷咁嘅仔仲遺憾啦！One's就表示，兩父子一擔擔真遺憾！jack8209就表示，對佢哋李家仝人的存在，亦同時感到遺憾！good2000就指李老豆的樓宇質素同價錢唔止遺憾，簡真係悲慘！（好似差開咗話題喎!）
而似乎係爸爸輩兼企响超人嗰邊的網友「要做資產管理啊」就直斥小小超：「簡直不知所謂，一派胡言！」佢話小小超「自己搞唔好仲要老豆出手，跟老豆40年一啲都學唔到，仲係度講遺憾？畀我有機會跟佢（超人）5日，咩都學到返來啦……」睇怕月尾真正揭盅時，父子雙方（即係買賣雙方）再拋出唔同「金句」嗰陣，網友又會有一番激烈討論呢！