經紀Ｋ接到地產Ｌ邀請，出席一個老爺車懷舊舞會，要穿着四十年代嘅服飾參加。地產Ｌ平時好鍾意玩車，收集舊款法拉利、波子等等，與同道者搞懷舊舞會，一定有睇頭。經紀Ｋ唔知四十年代服飾應該係點，諗咗一輪，去幫襯佢位波友（高爾夫球）服飾Ｙ嘅大寶號，服飾Ｙ啲改良新款時裝，有兩個著名，一個係著名昂貴，一個係著名好質地，好設計。經紀Ｋ上到畢打街服飾Ｙ間零售店，搵到一套啱身嘅中山裝，一睇價錢，連忙打電話畀服飾Ｙ，要求有折扣。老友鬼鬼，冇計啦，服飾Ｙ畀佢九折，送多一件Ｔ恤，唔話得之至。
服飾Ｙ以改良、現代化中國傳統服裝為己任，視生意為一種任務，講錢冇所謂之至，講到服飾設計與服飾代表嘅中國形象，就充滿激情與執着，絕對唔似一位生意人。生意人講賺錢啫，不及其餘，服飾Ｙ就唔同，佢見到布殊在上海參加APEC會議穿着一件藍色壽字短袍，就面都紅晒，認為係上海灘殘舊風情。好難講嘅，當今美國人仍有不少過時心態，以為美國電影之中嘅陳查理就係中國形象也。
呢日左丁山睇到「香港芭蕾舞團」將於十一月再度演出《蘇絲黃》嘅宣傳照，舞蹈員穿上蘇絲黃式高衩旗袍，重現六十年代初灣仔吧女形象於舞台上，為之失笑。左丁山唔識芭蕾舞，但威廉荷頓套電影以灣仔為背景，蘇絲黃其實係妓女，套電影又拍得唔好，純以大美國大男人看香港及中國之所謂東方神秘女性，藝術價值喺邊度呢？梁文道寫幾千字文章最醒最快，或者佢可以分析吓。「香港芭蕾舞團」係香港納稅人資助嘅舞蹈團，選擇題材，反映現代香港生活文化，唔係淨止「蘇絲黃」吖嘛？
睇見啲高衩短旗袍，左丁山幾乎想立即打電話畀服飾Ｙ，問吓佢嘅意見，不過知道佢對中國服飾咁執着，都係無謂刺激佢咯，見到面先至問佢意見啦，橫掂呢啲旗袍平時都唔會有大家閨秀願意穿着嘅啦。其實張藝謀在○四年雅典奧運閉幕禮上，呈現中國形象嘅手法，咪又係靚女穿上高衩短旗袍！服飾Ｙ唔好理咁多咯。自己做到最好就得啦！