11月嘅中午陽光依然猛烈，但秋風拂過就感到陣陣涼意，呢個時候最好Hea嘅地方，莫過於露天茶座。如果走去南區或西貢嘅海邊茶座，幾舟車勞頓囉！千金小姐殷櫻就介紹我去HABITU，喺銅鑼灣鬧市喎，會唔會太嘈呀？去到後，感覺竟然開揚又Relax，儼如城市中嘅後花園，難怪得到千金小姐嘅歡心啦！
記者：黃若茵
攝影：譚盈傑
唔愛食軟飯
殷櫻本身係愛吃之人，平日喺屋企乜都識煮，焗麵包都難唔倒佢，出街食飯多數都係同朋友敍舊，「難得一日出街食飯，梗係要食好啲，好食之餘仲要坐得舒服，好似張櫈咁，最好有椅背，如果坐得唔舒服，成晚點同朋友傾偈呀？」秋天時分，最寫意嘅地點殷櫻必揀露天茶座，「我好怕熱，所以夏天一定唔可以去露天茶座，𠵱家入秋天氣最啱坐露天位置，好舒適。」點解鍾情HABITU？「因為我怕嘈，呢度雖然喺銅鑼灣，但感覺好寧靜，只係隱約聽到人聲、車聲。」的確，坐喺餐廳內，城市感覺若遠若近，何等超然。餐廳本身提供意大利菜式，殷櫻就推介一道意大利飯，「我好鍾意食飯㗎！最好係較硬嘅米粒，所以半生熟嘅意大利飯啱晒我口味，太軟嘅飯無口感。我自己煮飯都會兩溝軟、硬米，煮出嚟更香㗎！」
時尚意菜 配搭新食材
HABITU自稱其意大利菜式夠時尚，點解？由大廚Alex解畫：「意大利菜式相比其他歐洲國家嘅菜式較傳統，即現今依然保留大量傳統煮食元素。當然我哋都重視傳統，但就會轉一轉採用新的食材，如意式薄切向來用生牛肉，我哋就用金槍魚，作不同嘅嘗試。」餐廳除咗菜式時尚，環境亦優雅。殷櫻最愛就係露天茶座，屬餐廳Garden區域，室內則另有Restaurant及Cafe兩個區，Restaurant與Garden之間以一長形吧枱相隔，區內以昏暗燈光、皮梳化及地毯帶出較高尚嘅進餐氣氛；Cafe區則用地磚、木椅及金屬椅營造較Casual嘅環境。你唔鍾意露天？仲有大把位俾你揀！
1.鮮帶子紅花意國飯$158
雖用了紅花，但加入白酒調校出嚟嘅Sauce令飯變成黃色，紅花本身係一種藥材，配海鮮最夾。帶子選用新西蘭品種，大隻之餘帶子味較重。
2.意式薄切金槍魚刺身$105
此菜式改良傳統，以金槍魚代替牛肉，血腥味少而肉味清甜，吃時可將金槍魚刺身捲到棒包上，有雙重口感。
3.意國海鮮薄脆$158
薄餅只有2mm厚，皆因用咗意大利入口嘅麵粉，可將餅底推得薄而不裂。海鮮餡料有三文魚、蜆、青口及魷魚等，餡料仲厚過塊餅。
4.海鮮海膽墨魚麵$188
墨魚麵自家製，用自行調配嘅海膽醬去煮，加入海鮮如蝦、帶子等，感覺較天然。不過略嫌份量較少，而醬汁嘅鹹味較重。
5.空運新鮮袋形水牛乳芝士‧鮮番茄‧巴馬火腿$108
水牛芝士呈袋形，賣相趣致更吸引，因其水份較少而口感更實在。麵包自家烘製，加點芝士番茄一齊食，香口又清新。
6.焗薄焦糖蘋果撻‧意式雪糕$55
蘋果撻以威化紙墊底，再放切片蘋果，整個撻非常薄脆。伴碟嘅意式雪糕用意大利Mascarpone軟芝士做，令雪糕更滑又有口感。
搵食攻略
HABITURISTORANTETHEGARDEN（28983919）
地址：銅鑼灣恩平道28號利園商場2期3樓
營業時間：星期日至四12:00nn-12:00am；星期五及六12:00nn-2:00am
交通：銅鑼灣地鐵站F出口
全店座位：160個
人均消費：午市$100；晚市$250
最好賣：Pizza