講開買樓，相信負擔得起嘅人都鍾意市區多啲，但𠵱家新界區個市好似愈戰愈勇，嚟緊又有幾個新盤推出，好似元朗葡萄園同首譽咁，睇嚟發展商都幾睇好西北嗰邊。
smooth喺《Uwants討論區》開咗個「點睇元朗樓市」嘅題，引嚟唔少網友發表意見，大部份都幾睇好，睇嚟班網民同啲發展商英雄所見略同喎。depwing一副專家口脗話：「元朗新樓必升，西鐵上蓋保守計要3600至4200元一呎……其他地區新盤太貴，TKO呎價要$4,XXXup，但嗰度已經太多樓……空氣質素未必最好，但比起好多新社區亦不算差。」
對於好多人覺得元朗好似烏煙瘴氣，佢反駁：「元朗多窮人亦有好多有錢人，社區複雜程度同其他地區一樣，試問除豪宅區人流較好啲外，邊區無黑社會、賊仔？豪宅區都會有社團人住啦，區區都有社會問題。」
交通網絡漸完善
另一位網友keroro將軍就大讚元朗交通方便：「話元朗交通唔方便啲人到底有無嚟過元朗呢？10年前元朗交通的確好唔方便，但係自從有咗三號幹線、西鐵之後，出荃灣唔使15分鐘，出中環只要30分鐘，依家屯門仲有船去珠海，明年仲會有去澳門航線㖭，我敢講九龍例如觀塘、紅磡好多地方都無元朗咁方便。」雖然有人大力推銷，但都係qp123m1一句「得」埋去：「交通都仲係一個問題，Even有所謂的鐵路，保到值已經唔錯。」