陳冠希（Edison）等於二世祖？
像老人家說從前一樣：「那是舊時的事了！」
以前的Edison，是玩世不恭，是吊兒郎當，家境富裕又不愁衣食，圍繞他的大部份新聞不是追女仔，便是發脾氣打記者，又或是因別人看不順眼捱打。
說也不信，現在的Edison好像不同了，對感情負責，成熟穩重，懂顧及他人感受，難怪他自己也自嘲「老」了。
26歲的Edison真的變了嗎？那是當遇上愛情魔法師Vincy之後的事。
真變還是假變？會打回原形嗎？要看魔法師的功力。
年輕人的事，都說不準。採訪：胡比、蔡如玉
由出道開始，陳冠希的緋聞女友多如繁星，陳文媛、MaggieQ、鄧麗欣、張栢芝、周麗淇、蔡依林、鍾欣桐、2R的Rosanne黃婉君，甚至早期的謝凱珊和顏穎思（Rachel），隨便數都有10個，位位靚女，卻從未有一位讓他願意公開承認對方正印女友的地位。今時不同往日，自從與名人楊超成女兒Vincy拍拖之後，對方就是有本事被他肯定，還得他寫歌讚頌。
淹沒在愛河中的Edison坦言：「開心，好開心，唔止係感情，我𠵱家嘅生活都好開心。」是不是因為被拍到與女友在美國街頭親熱的照片，才不得不公開戀情？Edison說：「唔係，我一向都話如果我覺得係一段穩定嘅感情，我就會公開，只不過冇理由無端端自己揸住支咪向全世界宣布：『喂，我拍緊拖呀！』我唔會囉，以前嗰啲（指緋聞女友），唔認係因為真係冇一段係真嘅，有啲人只係你會spend（花費）時間同佢一齊，但唔係真真正正穩定嘅愛情，就係咁簡單。」
早睡早起往跑步
從來只見新人笑，何曾聞得舊人哭？Edison一句說話就把以往女友完全否定，Vincy的魔力果真不凡，連Edison的生活作息都能改變。談到女友仍在求學階段，二人豈不是很少時間見面？Edison笑笑口說：「太深入嘅嘢我唔會講，只可以話，我近年開始少蒲咗好多，𠵱家好似平常人咁，我夜晚11點就瞓覺，一早起身就會去跑步，之後就會返公司做嘢，因為有太多嘢做同太多責任，不過我都會安排自己嘅時間，同我覺得好重要嘅人度過，好似係屋企人咁，唔係淨係女朋友，以前只係大時大節先會同屋企人聚會食飯，𠵱家每兩個星期左右，就會抽時間同屋企人見吓面同食飯，可能人大咗就會更珍惜身邊嘅人。」
「頒獎禮唔知做乜」
無論思想、生活，Edison為Vincy改變了不少，談到這裏，他轉移目標說：「我覺得我搞咗間公司之後，令我個人改變咗好多，做生意負擔好大，所有嘢都要親力親為，諗嘢都多方面咗。以前我做嘢嘅時候，覺得好辛苦，唔係做得唔開心，只係覺得成日都要對住啲記者講嘢，每日就要諗話題，跟住又唔知點解要坐喺頒獎禮上，都唔知自己做緊乜，好似搵唔到自己咁，但做生意就令我搵到自己，知道自己個位置，跟住我就會諗，其實人哋都係做嘢啫，都要食飯㗎，所以我𠵱家好少發癲，會盡量配合，我只係強調我唔鍾意狗仔隊，因為有啲真係好冇禮貌。」
近年Edison轉戰商場，但其實他還未放棄演藝事業，他謂：「兩者我都會兼顧，我覺得做生意同演藝都係我嘅事業。可能人哋會覺得我今年好似好少演出咁，只不過係我𠵱家有要求，要我拍戲我會追求有質地嘅嘢，唱歌會唱我鍾意嘅歌。」
近年Edison推出的都是以HipHop為主的唱片，但以前他初出道時，曾唱過不少冧女的情歌，問他是否不會再唱流行曲？Edison謂：「HipHop都係流行曲，不過現階段我只會唱HipHop，但係將來我唔知，因為我都會聽Jazz同其他類型嘅歌，我覺得人喺每個階段都會做唔同嘅嘢，唱歌都係一樣。」
重聽冧歌想作嘔
對於以前唱過的冧女歌，他笑謂：「有時聽番我都想嘔。」Edison直言：「過去就係過去，唔會後悔唱過呢啲歌，如果我冇做過呢啲音樂，就唔會做到𠵱家嘅音樂，而且嗰陣時真係幫我攞咗好多fans，否則𠵱家就唔會有咁多人支持我。」
最近就是因為他的生意，Edison有機會與偶像、著名黑人HipHop歌手KanyeWest合作，Edison謂：「起初係佢留意到我公司推出嘅衫，話想試吓，咁我當然好開心啦，後來仲同佢認識埋，我乘機邀請佢幫我做兩首國語歌，而稍後有個騷我都會出席，到時可能同佢有啲合作都唔定。」攝影：陳志嵐
