年屆44歲嘅關之琳（之之），皮膚好之餘，佢嘅35B、24、35fit爆三圍仲多年不變。不過幾好身材嘅女人，都需要「內在美」襯托，所以之之揀bra絕不馬虎，真係精挑細選。
依依不捨
早幾日夜晚7點零鐘，關仁喺中環威靈頓街巧遇之之，當時佢着住露肩吊帶衫，一個人閃入CalvinKlein內衣專門店睇bra同性感內衣。現場見之之都睇得好仔細，睇到啱先至伸手摸摸啲bra同內衣嘅質地。
雖然當時有唔少途人透過玻璃窗見到關美人睇bra，但之之氣定神閒，全神貫注留心眼前bra，佢喺店內兜咗幾個圈，睇咗一陣之後，都未睇夠皮就要走，當走出店舖時，佢隻手仲一路摸住櫥窗玻璃，好依依不捨咁款。原來因為之之預約咗時間，要去隔籬幢商業大廈內嘅髮型屋整靚髮，惟有睇bra睇住一半先，下次再嚟睇過啦。
之之對扮靚向來好有研究，由內到外都執得好「四正」，有傳佢推淋巴減肥、密做羊胎素facial同服抗衰老藥物保青春，養顏花膠、燕窩就當飯食，講到買bra囉喎，梗係更奄尖！如果之之唔係對扮靚咁一絲不苟，又點會令馬清偉、黃家諾、台灣小生霍建華同信樂團主音蘇見信等大班舊愛，咁多年嚟都被佢迷得暈陀陀吖？
採訪、攝影：娛樂突發組
