劉德華、吳奇隆、范冰冰、崔始源同導演張之亮，前晚出席喺上海影城舉行嘅《墨攻》首映，之後再出席觀眾見面會，華仔最後一個入場，觀眾反應最為熱烈，不停大叫同推擁，其間有一個着西裝嘅中年男人成功突破防線，衝上台攬住華仔唔放，仲將佢成個抱起喺空中打轉，保安見狀即時衝上台將該名男人拉走。
制止保安打歌迷
見慣大場面嘅華仔今次都被嚇親，佢講笑話好彩對方只係過份熱情，冇做其他嘢，華仔話歌迷衝上台係唔啱，但佢哋都係一時激動，所以有時見到保安扯歌迷頭髮，甚至郁手打歌迷，佢一定會制止，因為嗰啲都係支持佢嘅fans，而且佢哋又冇做過啲乜。
《墨攻》周四上映，華仔話對票房有信心，最初都有啲擔心套戲入面嘅道理後生仔睇唔明，不過上海嘅媒體話畀佢聽，25歲以下嘅年輕人都好鍾意呢套戲，令佢放下心頭大石。戲中飾演梁皇嘅上海演員王志文，喺活動後請眾演員擦大閘蟹，一盡地主之誼。
採訪、攝影：盧健
