由組合2R聯同香港舞蹈團主演的舞台劇《笑傲江湖》，前晚於香港文化中心首演時發生意外，飾演東方不敗的陳磊在半空吊威吔時飛墮而下受傷，送院治理，其角色改由副編排胡錦明頂替。
昨午2R在文化中心後台準備下午的演出，她們表示上午已往醫院探望陳磊，並說：「佢冇斷骨，只係右邊小腿骨移位，要留院觀察，其他地方就冇事。」家姐Rosanne表示：「知道佢出事時即刻喊咗出嚟，我都係第一次面對啲咁嘅嘢。」談到請來胡錦明上陣，她即大讚對方雖未曾正式排練，但已記得所有舞步，又說：「陳磊就唔開心，因為排練咗咁耐，演出唔到。」此外，2R表示前日太匆忙，眾演員未有參加拜神儀式，昨日會補做拜神儀式。
採訪、攝影：藍文浩