上月葵盛東邨轟動一時的「七小福」童黨傷人案，事件中「吹雞三姊妹」於案發後遷出該區「避鋒頭」，警方閃電拘捕七名童黨及罕有向公眾交代案情。記者事後找到七小福，頭目「大嚿」踢爆兩傷者原與童黨相識，「佢哋曾經響朵，仲打電話拖馬！」至於吹雞三姊妹原來是跟隨兩名男童向傷者「攞煙」引發爭執，案發經過與警方版本似有出入。 記者：張珮琪 黃曄寧 羅日昇
研究青少年問題學者指出，這宗童黨傷人案敲響青少年問題警鐘，事後記者曾兩度與童黨頭目大嚿接觸，最欷歔是他面臨法律制裁竟無悔意，只憧憬踏上江湖不歸路。昨日警方再將七小福（年齡15至18歲）保釋期延長至下月中，傍晚時分記者再到大嚿盤踞的葵盛東邨商場平台，當時他與同黨懶洋洋坐在一旁，問及未來，他只一臉不在乎：「我預咗要受，入硬男童院㗎啦！」
學校「收𡃁」再度被捕
大嚿一面狠狠抽煙，一邊與同黨談笑，可是突然他又操着不純正廣東話自爆：「啱啱上個禮拜又因為涉及喺學校收𡃁等六條罪，俾差人拉咗扣留48個鐘」。雖然說來淡然，但轉頭他又細心探聽，「如果我唔認罪，咁差人係咪告我唔入㗎」。說到底只得17歲的小伙子還是擔心入獄，失去自由。
上月28日下午，記者來到葵盛東邨商場平台案發現場追訪這宗童黨傷人事件，當時大嚿混在八名男女童黨中並不顯眼，面對提問亦不瞅不睬，突然他走到記者跟前，直認就是七小福童黨頭領，惟恐記者以為是「吹水」，他一臉得戚地攤開擔保紙展示一番。
這是記者首次與大嚿見面，當時他得意洋洋說「我冇案底」，揚言「出嚟行，預咗衰就一世！」暗示不怕罪成入獄，對兇險江湖路充滿憧憬，更暗示犯事入獄是必經洗禮。
這宗童黨傷人案發生於上月22日，兩名姓黃及梁（16及17歲）青年於葵盛東邨商場平台遇襲，警方一日後閃電破案，拘捕七名15至18歲童黨，並高調召開記者會，指兩名傷者與打人童黨互不認識，傷者因被指「眼超超」遭毆打，至於居於葵盛東邨的「吹雞三姊妹」則是目擊證人，七名童黨因傷人罪被捕。
重提傷人案，大嚿直斥兩傷者「好蠱惑，講到自己冇錯咁，（我哋）打人係唔啱，但佢哋有還拖㗎，唔好講到咁可憐囉！」說時目露凶光，一臉惡相。
身高1.7米的大嚿踢爆與兩傷者是舊相識，他指着公園一角「當時兩個傷者喺度媾女，我同其他人，仲有嗰三姊妹一齊。跟住兩個12、3歲𡃁仔話：『過去攞煙，逗吓佢哋咯』，嗰三姊妹又跟埋一齊去。」
指傷者曾致電「拖馬」
大嚿續道：「冇耐嘈起上嚟，我就同7、8個（人）過去，跟住佢哋（指傷者）就響朵，身形肥胖嗰個（傷者）就打電話『肥仔，我喺葵盛東邨商場L2俾人打，吹十幾廿個過嚟。』咁我哋咪郁佢囉。」講到打架過程，大嚿開始得意忘形。「打咗一鎚佢就瞓低，渣到死。」當問及有否「響朵」，大嚿不屑地說「（我哋）陀地打人使咩響朵㗎。」至於三姊妹角色，大嚿只說「佢哋在場有出過聲，但聽唔清楚，」似是刻意維護。
此時身旁一名童黨突施「偷襲」，掀起大嚿上衣，練得一身結實肌肉的他谷起肌肉炫耀一番，然後與童黨一哄而散。
