以前每到12月，都有人出嚟高呼「聖誕鐘，買滙豐」，雖然𠵱家未有耐到聖誕，但已經有網民提前叫大家入定貨，等食糊。滙控（005）前星期四曾上到152元歷史高位，之後因為旗下滙豐融資及美國滙豐公布第3季度業績令人失望，有大行調低滙控評級，結果股價俾人質到落上星期四最低146.30元，星期五收市報147.20元，升6毫子，𠵱家買唔買得過呢？
喺「香港討論區」入面，chengccc上星期五下晝開post：「聖誕鐘，買滙豐。唔知今年係唔係呢？」
Johnluk反問：「乜𠵱家仲興咩？」
tabo813就好有信心：「我相信到年底前，hsbc會見$156元。」
fugitive都係大笨象fans：「PE低，息率唔錯。都係嗰句，有買貴冇買錯。」但係via123就認為滙控「太貴」，佢建議買交行（3328）。
預測PE與同業相若
coolsay亦唔睇好，佢認為間公司可發展空間唔大。mohon則建議畀少少耐性：「太早買不好，聖誕鐘前大跌，聖誕鐘後補回，也是應了慣例。」
好多散戶有錯覺，認為滙控「太貴」，寧願買「平啲」嘅中資銀行股，其實呢種觀念一定要修正，滙控銀碼大，但實情一定貴唔過中資銀行股。根據Bloomberg資料，近排全城矚目嘅「五行三保」，預測PE由19.52倍至35.12倍不等，平均值逾26倍，但係滙控只係12.53倍。當然，公平啲講句，唔應該將滙控同呢8隻股份比較，畢竟市場唔同。咁就同國際同業比較，又係Bloomberg資料，花旗銀行、美國銀行同摩根大通銀行嘅預測PE分別係11.8倍、11.75倍同12.93倍，滙控又點算貴？
𠵱家入市，大家最驚係短期大調整，穩陣嘅可以分段買入，等佢破頂。
余文