近日娛樂圈喜事重重，繼張智霖同袁詠儀、以及吳家樂同周蕙蕙先後榮升父母之後，同99年亞視港男冠軍杜挺豪拍拖六年嘅亞視藝員黃璦瑤已經有咗4個月身孕，嚟緊07年佢哋又結婚又生BB，真係雙喜臨門！
當眾攬攬
上星期五，馮仁昭喺九龍灣德福廣場撞到亞視藝員杜挺豪同黃璦瑤，見佢哋又攬又拖，好鬼親熱，但最令馮仁昭意外嘅，係佢哋竟然不停睇BB用品，而着住鬆身衫嘅黃璦瑤又明顯肥咗，莫非佢有咗？
馮仁昭忍唔住走去問兩位當事人，黃璦瑤好sweet咁拖住杜挺豪話：「我有咗4個幾月，我哋都拍咗拖6年，生BB都係我哋計劃之內嘅事！」問佢哋幾時結婚擺酒，杜挺豪就話：「我哋未決定，可能等BB出世之後先至擺酒結婚，不過我媽咪同嫲嫲下個月會由加拿大返香港，到時點都會擺幾圍同屋企人食吓飯嘅！」
