上周六英超，樸茨茅夫主場憑簡奴射入一球，兼博到一個12碼，以2:1擊敗屈福特呢場，或者唔係一周焦點，但係之前畀自己球迷嘲笑死咗個仔嘅路亞，就射入12碼，在主場球迷面前作出無聲示威，求大俠都撐你呀！
今年25歲嘅路亞，其6個月大囝囝喺1月時因肺炎離世，令佢陷入人生低谷，但過去始終過去，佢亦勇敢克服，故此未有對佢足球事業造成好大影響；但唔知點解，路亞近期喺網上留言板，見到有啲樸茅球迷留言揶揄佢死囝囝，路亞一怒之下，同球會講佢希望離隊。
路亞日前就同傳媒呻：「我唔介意球迷大鬧我屎波，但佢哋針對我嘅家人，仲為我死去嘅兒子慶祝，指我係花花公子同埋喜歡打老婆，這實在難以容忍。」路亞邊搖頭邊講：「06年真係我人生最差嘅1年……我希望可以快啲過去。」球會主席史東利就撐路亞踩粉絲：「路亞的確表示過離隊意願，但嗰一小撮自稱樸茅球迷嘅人根本不需理會，網上的留言不能盡信；我知道路亞唔好受，但球隊係希望佢留低。」
卒之，簡奴博到12碼，全隊都特登讓畀路亞處理，道是無情卻有情，佢亦不負所託射入咗，今季首次主場入波，算係對主場球迷嘅無聲示威吧！
「路亞又係慘嘅，無啦啦俾啲無聊人拎佢囝囝出嚟玩，係人見到都會翳住翳住啦，我求大俠聽到都唔舒服，要啪番粒止痛藥止吓頭痛先！」