泥膠定格動畫（Cymation）向來被視為係過氣又式微嘅手藝，就算一手創造《超級無敵掌門狗》（Wallace&Gromit）嘅英國阿特曼動畫公司曾獲獎無數，仍未能改變呢種觀感，於是佢哋最近同美國CG界翹楚夢工場合作，創出首齣「電腦泥膠動畫」《沖出水世界》（FlushedAway），再找來曉治積曼（HughJackman）及琦溫絲莉（KateWinslet）配音，嘗試為定格動畫注入潮流味，更要玩盡英式品味，就連占士邦都成為被玩對象。撰文：戶川淳
將於本月30日上映嘅《沖出水世界》題材十分騎呢，竟然環繞老鼠同坑渠世界!話說倫敦上等寵物鼠洛廸（曉治積曼/古天樂聲演），某日俾隻坑渠老鼠入侵，仲一腳將佢伸落廁所沖出倫敦大坑渠，結果發現下面水世界光怪離奇，並拍住街頭辣妹洛蒂（琦溫絲莉/莫文蔚聲演）展開驚心大冒險。
玩寸英式icon
古仔格局講真頗老套，同上年《露寶治的世界》（Robots）甚至《反斗車王》（Cars）差唔多，但勝在阿特曼keep番陣英國味，再加上夢工場《史力加》（Shrek）式諷刺幽默，片中由「大騙兔」、「咪走雞」，到占士邦、英女皇、同英國國家足球隊統統成為被玩對象，務求用笑料搭夠。
今次阿特曼破天荒玩CG，係因為泥膠從來做唔出「水」嘅洶湧動感，於是惟有搵夢工場用CG幫手，不過雙方早有共識，就係要力保泥膠動畫嘅質感同埋真實感。於是佢哋決定照舊運用泥膠製作角色同場景模型，並特別校慢攝影機快門，模仿定格動畫嘅效果，睇落都好逼真。
今次阿特曼製作嘅布景前所未有咁龐大，包括長達6.5哩嘅地下隧道、220座建築物，淨係連接坑渠管道嘅螺絲釘已多達8,380粒！另外片中角色多達658個，總共拍咗109,058格畫面。因此雖然話有CG幫手，齣戲都足足拍咗三年。
配音陣容強勁
幾勁嘅畫面，都要靠配音帶出故事靈魂，曾經贏得四次奧斯卡最佳動畫大獎嘅監製NickPark，今次除咗搵曉治同肥溫配音之外，仲有《魔戒》（LordoftheRings）嘅「甘道夫」伊恩麥基倫（IanMcKellen）、「咕魯」安廸瑟克斯（AndySerkis），而香港版則有古天樂、莫文蔚、林曉峰及錢嘉樂等粒粒巨星。