香港素有「東方之珠」嘅美譽，小小的香港從前只是寂寂無聞的漁村，喺歷史書內都見得多，帆船就是代表這顆東方之珠的標誌。今時今日，除咗喺維多利亞港見到供遊客乘坐的仿古中式帆船「鴨靈號」外，喺南丫島都搵到另外一艘叫「東方之珠」喎！踏上船板吹吹海風，玩刺激又安全嘅無鈎釣魚，順便做一日漁民，體驗從前漁民嘅生活。
記者︰方綺君
攝影︰伍慶泉
model︰Algie、KaKa
動態釣魚玩到一身汗
日日坐office打電腦搞到腰痠背痛，加上被空氣污染指數日漸高企的生活環境蠶食，個個人都無嚟生氣，咁搞法實多病痛，倒不如趁假期入離島打個白鴿轉，做一日漁民，用力釣吓魚、大力拉吓網，在陽光普照的天氣下出一身汗，總好過比屈喺屋企煲碟健康得多。喺南丫島嘅漁民文化村內，就可以做晒以上所有活動，比起一般博物館得個睇字會更吸引，因為大家可以真正落手落腳，家長帶埋在家中享慣福嘅小朋友來體驗吓就最好不過。
靜態文藝活動定期更新
文化村內有大大小小的展館，可以參觀漁民做鹹魚嘅過程、各種捕魚用具，亦可登上三桅帆船睇睇昔日水上人家在船上的生活環境等，村內定期舉辦不同的靜態活動如戶外寫生、假日畫廊、撕紙及親子遊戲等。文化村早前就有搞咗一個戶外寫生畫展，以「浮家泛宅」為題，鼓勵參加者將自己印象中的南丫島畫在畫紙上。由現在至12月31日，就有得欣賞選出來的優秀作品喇！睇完展覽還可購買一些小擺設、海產及T恤等紀念品返屋企㖭！
南丫島漁民文化村（29828585）
開放時間︰星期一至日10:00am-7:00pm
接待處︰索罟灣第1街5號地下
網址︰www.fisherfolks.com.hk
特惠套票︰成人$88；小童及長者$68（親身體驗漁民生活）
全日票︰成人$60；小童及長者$50（適合垂釣人士）
兩小時票︰成人$40；小童及長者$30（適合旅遊人士）
食攞獎牛油焗龍蝦
玩完文化村，來到索罟灣要醫肚的話，首選當然係食海鮮，而我就介紹大家去天虹海鮮酒家，因為天虹是南丫島最模範的海鮮酒家，多次獲邀參加香港旅遊發展局主辦的「香港美食風采」，又攞過唔少美食大獎，食完仲有專船免費送你到中環皇后碼頭，咁好服務邊度搵呀？
牛油焗龍蝦$120-$140/隻
天虹最出名的攞獎菜式，唔食走寶，用經調校過的牛油加上洋葱煮焗，每隻約10両重，焗完後見到蝦肉脹卜卜，一咬就知道新鮮爽口。
椒鹽瀨尿蝦
$120-$140/隻
原隻瀨尿蝦因為新鮮味甜，全身拍上椒鹽才落鑊，我鍾意將蝦剝殼後灑上伴碟的椒鹽，令味道更加香濃。
酥炸吉列鮮魷$68
用來自南中國海的大尾魷魚，特點肉厚多汁，咁多汁炸過後都可以保持咁脆口，唔係度度可以食得到。
天虹海鮮酒家（29828100）
地址︰南丫島索罟灣第一街1A-1B23-25號
