噚日同大行老友入場睇跑馬，戲碼相當唔錯，有兩場二級賽包括香港短途錦標預賽及香港一哩錦標預賽，結果趙飛雲威番次，買中第6場香港短途錦標預賽連贏位「步步勇」搭「紙醉金迷」，散場後同大行老友去食大閘蟹。
食蟹時大行老友問趙飛雲係咪仲有好多蟹貨？因為以往佢啲客多蟹貨時，都會約埋佢一齊食蟹化解下，寓言食晒啲蟹就會冇蟹貨。其實今時今日散戶多數唔會有太多蟹貨，只愁倉內無貨，無法與大市同步上升。有個老友喺00年初在60元水平買入的中電信（現稱中移動，941），現在不但重見家鄉，而且仲有錢賺，佢仲話唔見70元唔食糊。
趙飛雲反問大行老友個市升完未？佢話早前睇錯市的基金，聽講佢哋最近掃完一輪貨後，已經買貨買得七七八八，稍後大市上升動力會放緩，港股可能進入整固期，出現有波幅而冇升幅的走勢，佢仲話中移動如果見到70元，不妨先食糊。
恒地重上46元轉強
趙飛雲倉內貨唔多，只剩下恒地（012）及地鐵（066），都算係揸得較安心嗰類，但買入亦非打算長線持有，有合理水位亦會沽出獲利。《蘋果》周日財經頭條話滙豐銀行可能下月再減息，消息或刺激地產股造好。技術上，恒地短期的阻力位在44.80元，而以補回上周一的下跌裂口45.90元為轉勢徵兆，到時可加注。短炒目標為5月高位47.70元。
趙飛雲