香港風之后李麗珊話養大一個細路仔原來要400萬蚊，咁退休又要幾多錢先夠呢？其實每個人嘅理想退休生活都唔同，好難話有一個確實數字。不過，趁後生為未來打算，點都有着數，至少可以趁有氣有力博殺搵錢儲老本﹗
《MSN討論區》網友MillertheLarge就話，好多美國人以為有100萬美元（約778萬港元）就夠退休，呢個諗法係錯嘅，因為只夠維持基本生活，要「豪」啲都唔得。佢就不甘過啲平凡日子，佢要每年去兩三次度假、有間背山面海嘅大屋，仲要有閒錢買禮物畀仔女、間唔中玩吓golf、去高級餐廳食飯都唔使「左度右度」。
佢要過咁嘅退休生活，唔怪得100萬美金唔夠啦！佢話每年使費要32.5萬，乘每年假設通脹率3.5%及距離退休的年期，假設退休後每年可取用資產5%，退休時要有2023萬美金（約1.6億港元）。
百萬元資產已足夠
唔少網友都畀佢呢個數字嚇親，Drwood5回應話呢位仁兄嘅收入，好明顯係家庭入息中位數嘅7至8倍，對普通人嚟講，要2000幾萬美金退休真係一個天文數字。佢話一般人如果唔係要每日大魚大肉，其實有百萬元資產，已足夠過舒適退休生活。
unexplained就認為每個人都有唔同嘅儲蓄目標，有啲人收入高可以儲多啲，有啲人搵錢少想儲都無，所以唔需要過份憂慮。佢好同意持續將閒錢投資係金融市場，長遠就可以儲到一筆錢，加上退休後搵份兼職賺啲零用，生活應該唔成問題。不過，佢曾經盲目跟風買咗連自己都唔知係咩公司嘅股票，結果蝕咗2萬幾蚊美金，相等於一年收入，欲哭無淚。所以佢奉勸各網友千祈咪盲目跟風買股，否則可能血本無歸！