今年樓市死氣沉沉，地產代理大行紛紛縮皮，細行反而逆市擴張。邊間咁勁？就係喺北角打躉超過10年嘅亞洲地產。佢哋噚日喺炮台山開第5間分行，仲請咗立法會議員劉健儀太平紳士做主禮嘉賓。
董事總經理蔡志忠話，市況偏軟，大行收緊資源，正係細行拓展嘅時機，唔怕「打對台」。況且新舖啱啱好喺炮台山道同英皇道交界個燈口位，行兩步就到地鐵站，人流多唔在講，仲係北角市區同半山嘅交接點，生意更有保證喎。
講到樓市前景，蔡生就話，銀行減息，股市暢旺，外來資金係咁湧入嚟，加上一手樓又暢銷，全部都係對二手樓市嘅好消息，預料踏入12月份，成交會更加活躍，尤其係港島區住宅同二三線舖位市場，唔單止投資回報吸引，仲好有前景，所以佢好樂觀咁估計，整體物業成交量同售價都會齊齊升。