睇過《蟻哥正傳》，又睇過《蟲蟲特攻隊》，《小蟻霸》仲有乜嘢新鮮感可以帶畀觀眾呢？當然有啦！因為今次一班蟻仔唔只淨係對抗其他昆蟲咁濕碎，佢哋仲勁到打完黃蜂打蟾蜍，打完蟾蜍再打低埋人類，簡直係螞蟻版嘅《天煞反擊戰》。再加上導演搵嚟茱莉亞羅拔絲同埋尼古拉斯基治等影帝影后做配音，單係呢個陣容，買隻碟返屋企儲都抵！
記者：周達之
配音陣容大過主人婆
華納電影要踩隻腳入電腦動畫市場，同彼思、夢工場及霍士嘅BlueSkyStudio爭飯食，當然要搵有份量嘅超級巨星嚟撐場啦！所以今次《小蟻霸》就動用咗天王天后嚟配音，除咗茱莉亞羅拔絲（蟻仔女主角亮晶晶）同埋尼古拉斯基治（蟻仔魔法師史Sir）之外，仲搵埋梅麗史翠普（蟻后）同《酒佬日記》嘅保羅基安馬提（大反派滅蟲專家）。而將同名童話故事改編成動畫呢個構思更係出自湯漢斯嘅鬼主意，你話陣容係咪強到你唔信先！所以《小蟻霸》雖然在港上映粵語版時票房一般，但有埋原聲英語配音嘅DVD一出就吸引咗一班識貨之人掃貨，搞到代理短短幾日要兩度入貨！
《小蟻霸》故事係講經常被人恰嘅花生仔，將憤怒發洩喺一班蟻仔身上，蟻仔魔法師史Sir於是研製出一種縮小藥水將花生仔縮到蟻咁細，蟻后判刑要勞改花生仔成為螞蟻一分子，喺勞改過程中與一班蟻仔結成好友嘅花生仔，最後領悟出螞蟻嘅團結精神，一齊對抗大反派滅蟲專家。
蟻民逐格睇
水浸蟻竇
專恰蟻仔嘅花生仔向蟻竇射水，搞到蟻竇洪水氾濫，成千上萬嘅蟻仔慘遭洪水吞噬，場面夠晒悲壯！
特訓勞改
縮細咗嘅花生仔要學習點樣同蟻仔合作攀山涉水，呢段講蟻仔夾硬要佢幫手砌蟻肉長梯，嚇到花生仔標尿咁滯。
重返家園
花生仔千辛萬苦都要返屋企打電話，呢段片導演想畀觀眾感受一下用縮細咗之後嘅視點嚟睇一般家居，原來感覺可以咁唔同。
人蟻大戰
滅蟲專家殺到嚟，花生仔用縮小藥水對付滅蟲專家，蟻仔兵團於是同一大群黃蜂合作實行空襲，上演另一幕《珍珠港》！
Bonus落足料炮製
《小蟻霸》嘅BonusTrack內容相當之豐富，共有五大Part，夾埋片長差唔多拍得住正片。「螞蟻雄兵」係介紹成套《小蟻霸》由構思到完成嘅過程，睇完之後包保你對動畫製作瞭如指掌；「螞蟻探險」收錄咗七段由劇中角色主演小短篇，內容完全獨立，OK抵死好笑；「螞蟻巢穴」係以動畫描述螞蟻被養喺玻璃缸入面所發生的無厘頭片段，唔知想表達啲乜；「遺珠鏡頭」收錄多段被抽起無出現喺正片裏面嘅片段，當中好多都係半完成品，畫面相當粗糙，唔想浪費所以收錄埋喺BonusTrack畀埋你睇；而最後嘅「戲院預告」就收錄咗段宣傳預告片，唔係剪輯片段拼湊而成，而係全新製作，算係肯花心機。
售價：$138（DVD）$58（VCD）
華納影視（31281791）
