𠵱家晚晚睇電視，喺無記播緊嘅劇集《東方之珠》都會見到朱咪咪，發覺睇住佢唱歌都不自覺聞歌起舞。今日同朱咪咪食飯，唔唱歌要講飲講食，知道作為唱家班的她無特別方法養聲補聲，真係得天獨厚，對煎炸辛辣食物都照食可也，不過佢最鍾意食魚，而且要海魚，可說係無魚不歡，好像上了癮一樣，每次到「咪咪飯堂」——海逸皇宮大酒樓食飯，連老闆都最鍾意問佢一句︰「蒸條魚食啦！」
記者︰方綺君
攝影︰何家亮
約朱咪咪做訪問前，叫佢揀間心水餐廳︰「去海逸皇宮啦，係我飯堂咁滯喇！」難得到處忙登台的她一口答應我，仲帶埋一班新加坡朋友充撐場面。加上到達現場，經理特登預留咗張對住無敵大海景的枱，對住個海食飯人都開心啲。
海洋皇宮係發源地
朱咪咪推介的海逸皇宮，就是以前海洋皇宮老闆開的，咪咪話︰「當我仲做『女』嘅時候，唔係喺『華盛頓』唱，就係喺『海洋皇宮』，呢度可以話係我嘅發源地喇！」朱咪咪到𠵱家都鍾意喺海逸皇宮打躉，「好多時同朋友食完中午飯就一路打雀局到夜晚8點晚飯時間，哈哈哈！之後佢哋去食飯，我就化妝Set頭準備唱歌。」日唱夜唱，有無方法護住把靚聲先？「我無特別方法去保護把聲，辣嘢照食，凍嘢照飲。」朱咪咪話唔夠瞓、又煙又酒先係靚聲殺手，加上講嘢同唱歌用錯位置發聲都會傷聲。
清蒸梗揀海魚
今次與朱咪咪同行嘅朋友全部來自新加坡，問佢哋朱咪咪唱歌好唔好聽，當然話好啦！但講到食物呢？大家都豎起手指公，「新加坡都有酒樓，不過無論點心款式到菜式，都無香港咁多咁新奇。」當日朱咪咪叫咗每次來到必食嘅大大粒蝦餃、「肥燶」叉燒同埋豬腳薑畀大家醫肚；不過講到佢嘅至愛，都係清蒸海魚，由訪問剛開場，至到邊食邊傾偈，不時都聽到佢同人講「蒸條魚食先啦！」跟住冇耐，就見Fans兼老闆嘅趙先生，整咗條清蒸紅瓜子斑同燜油囗上枱。朱咪咪哈哈大笑︰「我好鍾意食清蒸海魚，味道勁鮮；每次老闆見到我都同我講︰『蒸條魚食先啦！』𠵱家仲變成我嘅口頭禪。」
清蒸紅瓜子斑$16/両
屬朱咪咪至愛，食飯一定要有條魚，認為清蒸才能保持魚的鮮味。喺新加坡好難食到海魚，所以咪咪的朋友個個都食到係咁讚好呀！
（前）叉燒$28（後）豬腳仔$15
呢個就係咪咪姐口中的「肥燶」叉燒，有肥油又燒到少少燶先係真正叉燒；豬腳仔用秘製滷水醃製過，難得顏色不會太深，而且一啖放入口無骨又嫩滑。
甜豆帶子珊瑚蚌$98/例牌
鑊氣夠，所以珊瑚蚌和帶子落鑊快手炒一炒就食得，加埋顏色鮮艷的燈籠椒和甜豆，又白又紅又綠，食得又睇得。
蟹粉小籠包$15/個
小籠包嘅蟹粉多到漏出嚟，染到成個橙色，唔講仲以為一啲肉都無，原來豬肉吸收上湯同蟹粉後，多汁軟腍好好食。
乳豬拼盤$70/細
海逸皇宮有自己的燒味師傅製作燒味，不用其他供應商供應燒味，可以自己控制質素，唔會做壞招牌。
燜油囗時價（須預訂）
咪咪鍾意食魚，老闆趙先生話今日有條大油囗好靚，二話不說入廚房親自下廚煮魚，佢用火腩、枝竹、冬菇連油囗同燜半個鐘頭，仲話油囗多骨多膠質又多鈣，女人食完都靚啲。
豬腳薑$28
朱咪咪鍾意食豬腳薑，每次來到都食番碗，仲要連汁都撈埋，驅風驅寒飲到㷫烚烚，好飲到要帶多壺返屋企食。
新加坡朋友有嘢講
仔仔Alan：「我喜歡食叉燒，燒得好香口，又唔會太亁身，好好味呀！」
細佬James：「個流沙包真係好好食呀！可惜喺新加坡食唔到。」
細妹Janet：「每樣嘢食都好好味，揀唔到邊款最鍾意喎！」
搵食攻略
海逸皇宮大酒樓（31562877）
地址︰紅磡海逸道8號漁人碼頭3樓323號
營業時間︰星期一至日8:00am-11:00pm
座位︰約1,200個
交通︰紅磡火車站乘的士約$20；免費來回穿梭巴士每30分鐘一班，往返漁人碼頭商場至尖沙嘴中間道（局部時間提供服務）
有着數︰11:00am前及2:00pm後點心特價。由現在至12月，星期一至五食晚飯免茶芥及酸菜，假期除外。
明日預告
港台DJ周國豐、彭睛及羅啓新帶大家去食會令人流眼淚嘅壽司，想知有幾感動，就要留意明日介紹。
