對上1個星期有幾隻創業板股易手，其中一隻係寶訊科技（8089），曾出現過單日升幅逾11倍嘅誇張場面，歐陽風當日即刻同佢計計數，新買家喺場外以8仙價格接咗22%股權，只花419萬蚊就可以取得1隻創板股控權，成本好低。歐陽風又計過，隻股票當日成交只係116萬銀，就令市值炒高超過1億銀，「踢爆」新買家只要滲少少貨出街，隨時就可以賺番個買殼成本。噚日睇通告，呢間公司竟然話有意發行新股以增強公司財政。查實呢間公司之所以可以急升11倍，主要係因為冇乜街貨，𠵱家市值炒高咁多，到底乜嘢人肯高價接貨？
上個星期曾惹起斬倉疑雲嘅DBA電訊（3335），股權變動紀錄顯示，原來係第2大股東李氏，一到半年禁售期完結即刻喺市場沽貨，一沽就係4500萬股，減持逾5%之後，仍有19%。沽得咁急咁狠，照常理推斷，一係就好等錢使，一係就對間公司好冇信心。公司發表咗通告，話唔清楚李氏因乜沽貨，可能係佢覺得「價格合理」云云。
至於大股東俞氏就連續2日喺市場增持分別280萬股及574萬股。不過對比一下，呢個增持數目同第2大股東潛在要沽嘅億幾股，完全唔成比例，噚日股價急升14%，大股東可能又用咗幾百萬蚊子彈頂住，反過來睇，彈咗咁多個價位，反而仲比嗰位第2大股東高啲價再沽。喺未搞清楚第2大股東因乜事急沽隻股之前，散戶仲係睇定啲好。
歐陽風