潮流興學整蛋糕，不論OL或藍領，放工一有時間就去學！
廿零歲做到酒店糕餅廚師嘅阿阮，應該好多人羨慕吧！「其實做蛋糕真係要講天份，好味與否、材料份量至打勻時間，好多時都唔係跟死食譜，要憑感覺同經驗來決定！」美女做廚房，一定有好多男同事自動請纓幫手吧？「咁又唔係喎！好多嘢都係自己做番好，親力親為，可以學多啲嘢嘛！」
鍾意整蛋糕嘅人，大多數都係鍾意食蛋糕：「我最鍾意嘅係黑森林，有時整整吓會食番兩啖！驚唔驚師傅捉打貓（捉偷嘢食）？整蛋糕梗係要試味啦！唔試過又點知味道呢？就算畀多多我食，我自己都驚肥啦！」有時真係唔係好明，香港出名嘅蛋糕舖，點解多數都係酒店：「原因好簡單，不論用料以至裝飾，酒店都會比較不計成本；好似簡單一個栗子蛋糕，我哋可以花一日時間做新鮮栗子茸，然後再慢慢用嚟做慕絲、餅底、鮮忌廉，一般餅舖，跟本唔會咁花費人力物力咁做，所以想食靚蛋糕，記得過嚟買呀！」咁都要趁機Sell吓自己嘅蛋糕，美女廚師果然厲害！
記者、攝影：朱崇德
栗子慕絲蛋糕$150/磅
由蛋糕餅底、慕絲以至啫喱面，全部都係用鮮栗子茸製成，入口唔太甜，咁先食得出栗子的甘香味，感覺完全唔Heavy。
黑森林蛋糕$150/磅
係阿阮嘅至愛，當然做得有水準，蛋糕餅底仲細分成三層，中間夾住啫喱、車厘子同鮮忌廉，口感夠滑！
CafeMarco（21133912）
地址：尖沙嘴海港城馬可孛羅香港酒店1樓