好多女仔都怕揸哈利電單車，因為哈利又重又大架，一個唔小心，女騎士就會滾地葫蘆，無情情在條無通無阻馬路上跌落地，場面既狼狽又搞笑。我們找來20幾年駕駛哈利電單車經驗的顧問Ray哥指點一下。「P女（女仔新牌）因姿勢唔正確，當中以起「鋼」手最多，其實哈利電單車一啲都唔難操控，好似今次部新Sportster，車身比較矮，好適合女仔揸。」呢部XL50係50周年版，全球限量2,000部，不少哈利女Fans都一見鍾情，就等Ray教教路，如何把XL50走在街上又型又安全，各位新加入的Fans及新牌仔留意喇！
記者：陸伊琳
攝影：譚盈傑
女騎士 鍾情哈利Sportster
哈利家族有5大派，其中以Sportster最受女士們歡迎，皆因車身比較矮，比一般的街車更有質感，再說其發出的隆隆聲，有着美國車的吸引力，令P女一聽鍾情。這部50周年版配備1,200c.c.引擎，擁有最新ESPFIInjection燃油噴射，令輸出更有爆炸力，運作流暢及穩定。
Ray哥表示，「雖然比普通版賣貴少少，但一分錢一分貨，XL50內裏的機件自然會落本，所以在操控和加速上感覺會Smooth啲。此外，XL50全球限量2,000部，在錶板上亦刻有架車的編號，加上車身亦有個50周年金徽章，非常有紀念價值。」
車頭大 雙手要自然擺放
XL50係好車，但揸Sportster同做運動一樣，姿勢唔正確有機會傷害身體之餘，意外亦容易發生。「單睇P女阿VA就知，揸車時過份緊張，整個身體都僵硬，兩個手臂緊張到好似蟹一樣的『鋼』起晒，一來會令個人好易攰，二來在控制軚盤時都會有問題，唔能夠得心應手，反應又慢，最緊要係放鬆同自然，手踭微微向下。」
揸Sportster姿勢Do&Don't
停 車
Do
停車時把左腳放落地，重心偏左，左腳放得開一啲會較平穩，右腳保持放在腳踏上。
Don't
停車時不要雙腳或右腳落地，因為個Brake在右邊，一旦雙腳落地，就會停唔到車，而且不能有效使用煞車。
行 車
Do
行車時雙腳是放在腳踏上，便於控制速度、波段及停車。
Don't
很多人會把腳放在腳踏後方，讓雙腳舒服一點，但這樣做會很危險，一來接觸唔到個Brake，二來腳部亦會給高熱的死氣喉燙傷，愛靚的女士尤其要小心。
手 勢
Do
隻手要時刻都掂住個手Brake，隨時作出反應，幾多隻手指去操控，就視乎隻手有幾大，一般女仔手都較細，可能會用上3至4隻手指，不像男士們可以用2隻手指輕鬆吊着。
Don't
開車時不要只握緊手把，而忘記捉摸着個手Brake，緊急時就會來不及。
坐 姿
Do
坐姿輕鬆，手臂、肩部放鬆，令雙手控制自如，又不傷背部。
Don't
切忌身體僵硬，手臂和手踭位置起「鋼」，因為這個姿勢會影響平衡，特別是高速行車或轉急彎時，技術麻麻的女士們就會難以控制個車頭。
轉 彎
Do
轉彎時，轉左就把右手推直，重心依然保持中間，只是微微傾左。
Don't
轉彎時把整個人傾埋一邊的話，很容易會失重心而翻車。
推 車
Do
推車要札起個馬，才容易發力。
Don't
Sportster重近300磅，女士們要推車真的要小心，使用不合適的姿勢來推車，亂推廿四，容易會令腰部受損，既勞損筋骨又費力。
XL50設備起底
XL5050周年紀念Sportster
引擎：1,200c.c.風冷2氣缸
扭力：79.1ft.lbs/4,000rpm
售價：$132,300
售賣點
Harley-Davidson旗艦店
（28068182）
沙田源順圍5-7號沙田工業中心地下A5號