每年呢段時間都特別心野野！一年一度澳門格蘭披治大賽又殺到嚟；過大海、剛落船，對正起點看台，聽見車聲隆隆已叫人血脈沸騰！碼頭打的、一欄之隔同F3賽車並列轉入友誼大馬路，走上全澳門最高5星級星際酒店，窗外賽車風馳電掣跑過，還可邊歎住美酒美食；如此美景美食喫一大餐，簡直同賭枱上搏殺一樣咁刺激！
記者：朱崇德
攝影：楊錦文
好一陣子冇過澳門，感覺變化好大；從外港睇見嘅漁人碼頭，到澳門新發嘅第3間賭牌──星際酒店都開埋！而且碰啱今日澳門格蘭披治大賽開幕，賽車從身邊呼嘯而過，濃濃汽油味伴着震耳欲聾的引擎聲、強烈氣流拉扯得人仰前傾，那份全立體感受的刺激，睇電視從未感受過！
當地澳門人話：「可能市道好咗，今年嚟睇賽車嘅人都多咗，來往港澳船票價格冇郁過（日間$150-$155、晚間$172-$175），但就會坐得逼啲；酒店入住率都有8成，即日訂房都真係幾緊張！」言談間，有一個好地道的笑話：「我哋會叫格蘭披治做『澳門大塞車』，外港呢邊周圍封路改道，好易塞車，如果約咗人，記得早啲出門口！」
對出就係賽道
講到新開星際酒店最正位睇賽車，都係大堂酒廊，只係一窗之隔、十數步之遙，就對正葡京彎之前的友誼大馬路賽道，賽車經過時，完全可以感受到玻璃震盪的壓迫感！而且酒廊仲特別預備了數款賽車酒飲，應節到痹！
FinalLap$38
製法是以橙酒加伏特加做主，再加入大量啤酒撞起，入口有啲似橙味啤酒。
（右）格仔旗$30
透明的Vodka同黑色的咖啡酒兩層相間，營造格仔旗的效果；入口酒味幾重，略帶香甜易入口效果！
（左）DayLight$30
呢杯「日光」係靚女必選，以重糖份的咖啡酒作底，在面層加入鮮奶，幾似咖啡特飲。
大堂酒廊
電話：（853）2908608
地點：酒店大堂
營業時間：8:00am-2:00am
丹桂軒澳門首開分店
返開國內玩，丹桂軒呢個廣東酒家嘅名牌，大家應該幾熟吧！用料一向最靚，少油、冇味精夠健康，喺國內開業已10年，首間國外分舖，竟然喺澳門星際搞；據知開業未夠一個月，好多老饕都未知，價錢大致OK，只是稍稍貴於國內店。
旗開得勝（蔬果蒸龍脷）$1,180
阿廚話：「野生龍脷真係好難搵，不過澳門附近水域都仲有出沒，所以呢味菜係澳門丹桂軒獨家菜式！」據知齋魚價都要$700。
獨佔鰲頭（川芎魚頭鍋）$98
天氣稍涼，川芎魚頭鍋性溫滋補，最啱女士們進補！以8至10斤水庫魚頭，配上川芎等藥材，再加煲至奶白的老火魚湯做底，飲完成身暖笠笠。
肥牛過橋米線$68
「一落單我哋就會在客人面前即做米線！」肥牛用新西蘭貨色，軟滑如布絮；以火爐、鑊仔微溫着，暖意十足。
丹桂軒
電話：（853）2908628
地點：酒店2樓
營業時間：11:00am-00:00mn
對正友誼大馬路
「香港出年1.1食肆全面禁煙！我哋呢邊開定雪茄房，就係為迎接有需要嘅人！」據稱，星際酒店嘅16/F雪茄房，係全澳酒店中第一間：「基本香港買到嘅古巴、多明尼加雪茄，呢度都一樣有齊，而且價格大概仲平咗20%，原因為澳門煙稅較香港平嘛！」除咗食雪茄，呢度仲有個空中花園，望落去就由起點轉入友誼大馬路開始，直睇入葡京彎，睇賽車一流。
避風塘 賭枱邊喫一餐
有人話賭錢叫人廢寢忘餐，我就話去星際記得邊賭邊喫番餐，講緊係博彩廳內的「避風塘」，近290張博彩桌和300台角子機圍住你食飯，睇住人哋賭到滿頭大汗，自己就寫意細嚼，真係有種不協調的快感。
王者之最（避風塘蝦餃皇）$30
$30食籠蝦餃咁富貴？因為佢罕見地以新鮮原隻中蝦整蝦餃，裏面9成係蝦肉，再加韭菜同豬肉，入口超彈牙！
鐵甲迷情（避風塘炒蟹）$238
以斤幾重大青蟹，以亁葱、蟹油及蒜茸等炒香；蟹身膏脂唔多，但蟹肉味濃，火候剛剛好，入味又肉嫩。
地點：酒店1及3樓
電話：（853）2908618 營業時間：24小時