唔少潮人𠵱家嘅注意力都集中晒喺PS3度，不過老任嘅Wii亦都如箭在弦，美版呢兩日應該有得見街，而日版則要等到12月2日左右。有相熟舖頭老細搵我吐苦水，指美國嗰邊隻《撒爾達》玩到好絕，冇得批淨Game，一定要天價連機咁入貨，亦即係話就算啲舖頭肯拆出嚟賣，一係我哋要硬食OverPrice價錢，或者舖頭哽咗個差價，須知呢點絕不可能，所以想買頭批美版機連《撒爾達》嘅朋友，就要付出較大代價。
至於呢幾日都有啲傳媒提及嘅行版Wii，甚麼記者會定係換代理呢啲料，全部都冇人可以證實到，不過我就喺啲舖頭同Game廠度打聽到，Wii有9成機會喺農曆年前亦即明年1月左右抵港，代理依然係嗰間做，價錢、Packing同用乜嘢牛就仲未確定到，不過有進一步消息我會即時向各位滙報。
記者：快D_HL
《LostPlanet》行貨集美日優點
或者上次《DeadRising》行貨令人稱心滿意，CapcomAsia喺Xbox360嘅另一大作《LostPlanet》依然會以全英文顯示嘅美版作為行貨內容，換言之血腥火爆程度一定冇走雞。另外據知呢隻日版會有連線上網問題，屆時代理唔會返日版嚟賣，聰明嘅讀者應該知道點做啦！
亦因為要遷就美版推出日期，佢將會比日版遲些少見街，喺出年1月12日發售，價錢方面官方就實牙實齒話「一定平過水貨」，計番美版同日版都要成59.9美金(約467港元)及7,980日圓(約550港元)，加上行貨都會送番日版先有嘅靚靚特典「GameVisual資料集及高解像設定書」，一次過滿足兩種享受，今次點計都冇理由買水貨㗎？
喺呢個專欄筆者會同大家講吓Game場得意嘢，幫大家收吓料！