美國公布CPI連跌兩個月，上月跌0.5%，跌幅大過市場預期，不過美股創新高之下，港股昨日竟然低開，令人有少少意外，之後個市逐步收復失地。
CPI再跌，加上油價勁跌4%，明年美國減息機會又再大些，不過手持恒地（012）股價微跌。恒基四叔話，炒股好過起樓，因為揸住隻國壽（2628）話咁易就升兩三倍。遇着呢個「瘋牛」市至係啫，股市靜番，點都係起樓好搵。
中信定要順勢炒
既然睇好減息，買埋四叔隻地產股，無理由唔吼番隻二線地產股，昨日睇見兩隻圖表似模似樣嘅地產股大昌集團（088）同埋香港興業（480），都係位處相對低位同埋出現突破，2揀1會選擇香港興業，始終成交同市場流通量會好少少，破旗後睇4.10元至4.20元，會有約一至兩成上升空間。
另外，落後紫籌見中信泰富（267）破位，圖表上出現大陽燭突破近3個月橫行區，炒落後睇28元，有唔錯水位。呢間老牌紫籌綜合企業，自國泰（293）重組後航空業務減少咗，主力發展內地房地產業務同生產特種鋼鐵，電訊、基建、電廠、貿易各有貢獻。呢隻股票好奇怪，一係悶到你暈，一升就要你追唔到貨，好似4月時兩個零禮拜就升咗5蚊幾，轉過頭又跌番晒，炒呢隻股，一定要順勢。
趙飛雲